Volver ao contido

Notas de prensa

A Xunta ofertará máis de 10.300 prazas no proceso de estabilización de emprego

A Xunta ofertará máis de 10.300 prazas no proceso de estabilización de emprego

  • Do total de prazas, 8.703 faranse polo sistema de concurso de méritos e 1.635 a través dun concurso-oposición
  • Con esta oferta, que se publicará antes do vindeiro 1 de xuño, dáse cumprimento aos prazos marcados na Lei 20/21 
  • A taxa de temporalidade situarase por debaixo do obxectivo do 8% fixado pola lexislación do Estado

Santiago de Compostela, 25 de maio de 2022.- O Consello da Xunta aprobou hoxe, mércores, os decretos de Oferta de Emprego Público (OEP) da Administración Pública para a oferta de 10.338 prazas no proceso de estabilización de emprego establecido na Lei 20/21 do 28 de decembro, de medidas urxentes para a redución da temporalidade no emprego público. A Lei distingue dous tipos de procesos: un de estabilización mediante o sistema de concurso de méritos no que se valorarán exclusivamente os méritos e outro a través do sistema de concurso-oposición que comporta a realización de exames.

Cómpre salientar que ás 10.022 iniciais, súmanse outras 316 prazas de estabilización ao incluír prazas do Consello Económico e Social, da AMTEGA  e outros entes instrumentais e das alegacións presentadas polas Consellerías. Así, 8.703 seleccionaranse polo sistema de concurso de méritos e outras 1.635 a través dun concurso-oposición. 

O primeiro dos procesos empregarase para seleccionar todas as prazas que estivesen ocupadas de forma temporal e de xeito ininterrompido con anterioridade ao 1 de xaneiro de 2016, mentres que o segundo será de aplicación ás prazas ocupadas de forma temporal e ininterrompidamente polo menos os tres anos anteriores ao 31 de decembro do ano 2020.. O primeiro dos procesos empregarase para seleccionar todas as prazas que estivesen ocupadas de forma temporal e de xeito ininterrompido con anterioridade ao 1 de xaneiro de 2016, mentres que o segundo será de aplicación ás prazas ocupadas de forma temporal e ininterrompidamente polo menos os tres anos anteriores ao 31 de decembro do ano 2020. 

Con esta oferta, que se publicará antes do vindeiro 1 de xuño, dáse cumprimento ao establecido na Lei 20/21 de medidas urxentes para a redución da temporalidade no emprego público. As correspondentes convocatorias deberán publicarse antes do 31 de decembro deste ano.

Así mesmo, resérvase para seu acceso pola quenda de discapacidade o 7% do total das prazas que se inclúen na oferta. Coa incorporación de persoal fixo nestas prazas de estabilización, máis as prazas xa convocadas, a taxa de temporalidade situarase por debaixo do obxectivo do 8% fixado pola lexislación do Estado.
Administración Xeral
No que se refire ao eido da Administración, das 6.480 prazas ofertadas, 4.641 correspóndense con prazas de emprego público na Administración Xeral e 1.839 con prazas das entidades do sector público autonómico. Dentro das entidades do sector público, 1.357 prazas pertencen ao Consorcio Galego de Servizos de Igualdade e Benestar, no que 1.195 serán susceptibles de seleccionarse polo sistema de concurso de méritos e 162 por concurso-oposición. 

Sanidade
Pola súa banda, o número total de prazas que o Servizo Galego de Saúde vai ofertar é de 2.568, das que 760 cubriranse polo sistema de concurso-oposición e 1.808 polo procedemento excepcional de concurso. 

Este novo proceso súmase ás 8.218 prazas ofertadas polo Sergas nos últimos dez anos, o que suporá logo da súa resolución, a incorporación de preto de 11.000 profesionais, con vínculo fixo, ás institucións sanitarias do Sistema público de saúde de Galicia e que situará a taxa de temporalidade estrutural do organismo coa incorporación das  ofertas públicas de emprego actualmente convocadas no 4,72% dende o 23,55 actual. 

Por categorías, 601 prazas corresponden a persoal licenciado sanitario, 733 a persoal diplomado sanitario. Ademais, de persoal sanitario de formación profesional a oferta ascende a 609 prazas, ás que hai que engadir 34 de persoal investigador.

Así mesmo, o Consello aprobou a oferta de emprego público extraordinaria para a estabilización de emprego temporal do persoal sanitario funcionario da escala de saúde pública. O número de prazas ofertadas é de nove, das que catro son de inspectores médicos, tres de farmacéuticos inspectores de saúde pública, ademais dunha de diplomado universitario de enfermería e outra de subinspector sanitario.

Ensino
No relativo á oferta de emprego público para postos docentes, aprobouse un total de 1.281 prazas. Delas, 1.156  son derivadas da aplicación das disposicións adicionais sexta e oitava da Lei 20/2021, do 28 de decembro, de medidas urxentes para a redución da temporalidade no emprego público. Desenvolveranse, segundo o indicado polo Goberno central, polo sistema de concurso de méritos, que se abrirá a partir do último trimestre do ano.

As restantes 125 prazas, derivadas da aplicación do artigo 2.1 da mesma lei estatal, desenvolveranse polo sistema de concurso-oposición, que se convocará no último trimestre do ano e cuxas probas se celebrarán o próximo verán.
 
Prevese rematar este proceso de estabilización en 2023 cunha taxa de interinidade docente do 6% no conxunto das prazas. Cómpre lembrar que este proceso extraordinario é de obrigado cumprimento para Galicia, malia que a nosa comunidade xa cumpre neste momento o obxectivo de interinidade docente do 8% que esixe o Goberno central para finais de 2024, mentres que a media estatal é do 25%.