A directora da AMTEGA destaca a importancia de Galicia como campo de probas da tecnoloxía 5G tras acoller 30 experiencias piloto
- A directora da Axencia para a Modernización Tecnolóxica de Galicia (Amtega) destaca como obxectivos que os operadores avancen no despregamento e os sectores produtivos poidan aplicar as solucións aportadas polos proxectos piloto
- Orange presentou en Santiago os resultados dun dos dous proxectos piloto de 5G asignados a Galicia no Plan nacional para o desenvolvemento desta tecnoloxía
- Mar Pereira destacou o potencial da tecnoloxía 5G para facer fronte á conectividade de altas prestacións nun territorio con elevada dispersión, como Galicia
- Galicia foi o escenario para as probas de 30 casos de uso de 5G, que implicaron investimentos de máis de 22 millóns de euros e mobilizaron a cerca de 40 entidades públicas e privadas
- O desenvolvemento do Plan Galicia 5G e do nodo de colaboración Galicia 5G situaron á nosa comunidade como territorio estratéxico en Europa para a implantación desta tecnoloxía
Santiago de Compostela, 30 de xuño de 2022.- A directora da Axencia para a Modernización Tecnolóxica de Galicia, Mar Pereira, destacou hoxe que Galicia foi "un excelente campo de probas do 5G" e destacou como obxectivos que as operadoras avancen no despregamento territorial desta tecnoloxía e que os casos de uso que foron un éxito se implanten como solucións reais nos diferentes ámbitos produtivos.
Mar Pereira fixo estas manifestación no acto no que Orange presentou en Santiago de Compostela os resultados dos 13 casos de uso que desenvolveu en Galicia no marco do seu proxecto do Plan Nacional 5G. A nosa comunidade foi o escenario de dous proxectos do Plan Nacional e un proxecto propio do Plan Galicia 5G. En total, desenvolvéronse 30 probas de uso de esta tecnoloxía en aspectos como a asistencia médica en calquera lugar, a loita contra os incendios, a banca en áreas rurais, a educación, o deporte, o turismo, o agro... Estas probas implicaron un investimento de máis de 22 millóns de euros e mobilizaron cerca de 40 entidades públicas e privadas.
Este posicionamento de Galicia como rexión de referencia cara ao despregamento desta tecnoloxía fixo que Galicia acollera a primeira experiencia mundial de roaming en 5G e Vigo e A Coruña están entre as primeiras cidades de Europa en dispoñer desta tecnoloxía.
A directora da Amtega indicou que, na última década, "os resultados das políticas de transformación dixital permitiron a Galicia avanzar na converxencia coas rexións máis avanzadas de Europa". Estes resultados permiten agora "afrontar unha nova etapa e falar do desenvolvemento en Galicia do 5G, da Intelixencia Artificial, dos servicios na nube, da robótica e a automatización de procesos...". Os proxectos pilotos de 5G mostran a importancia de aplicar estas tecnoloxías dende unha fase temperá do seu desenvolvemento. Segundo manifestou Mar Pereira, Galicia pode facelo "ao dispoñer dun sector tecnolóxico maduro e unha sociedade cada vez máis preparada".