O tecido empresarial galego incrementa o investimento en ciberseguridade en máis dun 30% nun ano

• Pemes e micropemes destinaron en 2023 máis de 150 millóns de euros a protexerse fronte á ciberdelincuencia, 36 millóns de euros máis que o ano anterior 
• Preto dun 20% das pemes e grandes empresas rexistraron algún incidente de seguridade en 2024
• O uso de tecnoloxías como a IA ou o Cloud Computing por parte das empresas galegas de dez ou máis empregados sitúase por riba da media estatal
• Unha de cada cinco empresas de 10 ou máis empregados conta con especialistas tecnolóxicos, case 5 puntos máis que a media estatal

Santiago de Compostela, 21 de xuño de 2025.- O tecido empresarial galego investiu en 2023 máis de 150 millóns de euros en ciberseguridade, o que supón un incremento de máis dun 30% respecto á cifra do ano anterior. Pemes e micropemes destinaron 36 millóns de euros máis a protexerse fronte á ciberdelincuencia.

En 2024, preto dun 20% das empresas galegas de 10 ou máis empregados rexistraron algún incidente de ciberseguridade. A maioría (78%) son casos de falta de dispoñibilidade dos servizos TIC por fallos no software e hardware e, en menor medida (19,6%), sitúase a perda de datos debidos a ataques exteriores. Nas pequenas empresas os incidentes de ciberseguridade non chegan ao 4%.

Son datos do informe Galicia. A economía en dixital. A Sociedade da Información nas Empresas de Galicia, edición 2024, publicado hoxe polo Observatorio da Sociedade da Información e a Modernización de Galicia (OSIMGA), adscrito á Axencia para a Modernización Tecnolóxica de Galicia (Amtega).

Tecnoloxías disruptivas
O informe analiza tamén o uso das tecnoloxías disruptivas por parte das empresas galegas. En 2024, o 13,1% das empresas con 10 ou máis persoas traballadoras empregaron a Intelixencia Artificial, superando en 3,5 puntos porcentuais a media estatal. No caso das microempresas o uso desta tecnoloxía non chega ao 6%, unha cifra moi parella ao indicador estatal.

Ademais, o informe sinala que máis do 30% das grandes empresas empregan servizos de Cloud Computing, principalmente para a xestión do correo electrónico, o almacenamento na nube, servidores de bases de datos e software de ofimática. Nunha porcentaxe próxima, o 27%, está o uso da analítica de datos neste perfil empresarial, sobre todo aplicada a datos sobre clientes (65,8%) e rexistros de transaccións (85,3%).

Talento Dixital 
O 20,5% das empresas galegas de 10 ou máis persoas empregadas contan con persoal de perfil tecnolóxico, o que sitúa a Galicia a 5 puntos por riba da media estatal (15,7%). Os expertos en datos e ciberseguridade son os que teñen maior presenza nas empresas.

O  52,5% das empresas de 10 ou máis empregados que contratan estes perfís empregan mulleres especialistas TIC. No caso das microempresas, a contratación de mulleres especialistas TIC acada un 44,9%, rexistrando un incremento relativo do 136,3% dende o último ano.

Comercio electrónico e presenza online
No 2024, as cifras de vendas mediante comercio electrónico mantéñense en porcentaxes moi similares ás do ano anterior. O cambio máis destacable é o aumento na porcentaxe con vendas das empresas de 0 a 9 empregados, que pasa dun 11,8% a un 12,5% (+5,9%).

O 81,4% das empresas galegas de 10 ou máis persoas empregadas dispoñen de páxina web, moi preto da media estatal (81,8%). Nas microempresas galegas, a dispoñibilidade medra un 24%, pasando do 23,7% ao 31,2% nun só ano.

Poden consultarse os datos deste informe na seguinte ligazón: www.osimga.gal