Volver ao contido

Notas de prensa

A Xunta asina a constitución do Consorcio europeo de goberno intelixente ‘Govtech4all’ xunto con outros 21 organismos de 15 países

A Xunta asina a constitución do Consorcio europeo de goberno intelixente ‘Govtech4all' xunto con outros 21 organismos de 15 países

  • A Axencia para a Modernización Tecnolóxica de Galicia, o Ministerio de Asuntos Económicos e Transformación Dixital, o concello de Madrid e a Deputación Foral de Biscaia son os catro integrantes españois deste consorcio
  • Govtech4all é resultado dun acordo de asociación que desenvolverá proxectos piloto para fortalecer o mercado único europeo a través de novos modelos de innovación ao servizo das Administracións públicas
  • Galicia participa nunha das tres primeiras accións piloto, sobre seguridade na información en espazos de datos transfronteirizos
  • A Xunta xa dispón dun programa de desenvolvemento da Administración dixital GobTech que inclúe un acordo marco de 30 millóns de euros para o impulso de tecnoloxías avanzadas no sector público

Santiago de Compostela, 25 de maio de 2023.- A Axencia para a Modernización Tecnolóxica de Galicia participou hoxe en Bruxelas no acto de sinatura do acordo de asociación que pon en marcha o consorcio Govtech4all para experimentar novas formas para proporcionar innovación ao sector público a través da colaboración público-privada.

O proxecto permitirá a elaboración de entre catro e seis proxectos piloto conxuntos nos que se aplique un amplo conxunto de metodoloxías de goberno intelixente. Neste contexto, e segundo explican os promotores da iniciativa, "as incubadoras, os laboratorios de innovación e os equipos dixitais de ‘Govtech' deseñarán os desafíos a través dun enfoque de creación conxunta". Ademais, o consorcio terá tamén como obxectivo o de crear conciencia sobre os gobernos intelixentes, dispoñer dun mapa de situación sobre o desenvolvemento das administracións dixitais e compartir as leccións aprendidas entre os socios e outros actores da UE".

No Acordo Marco de Asociación participan axencias e empresas de 15 países europeos: España, Bélxica, Portugal, Polonia, Países Baixos, Suecia, Grecia, Letonia, Luxemburgo, Alemaña, Estonia, Dinamarca, Lituania, Francia e Italia. Por parte de España, os asinantes son o Ministerio de Asuntos Económicos e Transformación Dixital, o concello de Madrid, a Lantik (sociedade participa en exclusiva pola Deputación Foral de Biscaia para a transformación dixital) e a Axencia para a Modernización Tecnolóxica de Galicia.

O acto desenvolvido hoxe en Bruxelas contou coa participación do comisario europeo de Orzamento e Administración, Johannes Hahn. Tamén participou como invitado o vice-primeiro ministro de Innovación de Ucraína, Mykhailo Fedorov, que acudiu á capital comunitaria para presentar o modelo ucraíno de goberno dixital e a importancia que ten a aplicación "O Estado no móbil" para manter unida á unha poboación que está a ser atacada.

Por parte da Xunta, participou na sinatura a directora da Oficina de Apoio Estratéxico e Planificación da Axencia para a Modernización Tecnolóxica de Galicia, María Bobillo, que estivo acompañada pola coordinadora técnica de Políticas Europeas da Fundación Galicia Europa, Vanessa Lobo.

No acto de hoxe tamén foron presentados os tres proxectos piloto escollidos para a primeira fase de Govtech4all sobre "Desafío das startup", "Axuda á cidadanía europea para obter beneficios sociais dos Asistentes Persoais de Regulación (PRA), e "Seguridade da información en espazos de datos transfronteirizos". Nesta última participa a Axencia para a Modernización Tecnolóxica de Galicia.

Contratación pública IA
A Axencia para a Modernización Tecnolóxica tamén participou hoxe en Vigo na xornada sobre "O Marco Legal para a Contratación Pública de Intelixencia Artificial na Unión Europea". Baixo o título "Contratación pública da Intelixencia Artificial: construíndo unha ponte entre a regulación europea e a necesidade rexional", o director da Axencia autonómica, Julián Cerviño, avanzou os retos da Administración autonómica como usuario de Intelixencia Artificial, apuntando ao uso de compra pública innovadora e outras formas de colaboración para construír solucións a medida. 

Neste ámbito avanzouse coa creación dun departamento de xestión de datos para establecer políticas e guías que garantan a calidade dos datos e o seu uso adecuado en futuras aplicacións de técnicas de IA. Ademais, está en vigor un Acordo Marco para a aplicación de tecnoloxías disruptivas no sector público autonómico.

O director da Axencia para a Modernización Tecnolóxica de Galicia destacou que Galicia aspira a converterse nunha rexión intelixente impulsando o desenvolvemento dunha intelixencia Artificial punteira, ética e segura que permita avanzar cara unha economía baseada  no coñecemento.

Neste sentido, Cerviño destacou o papel da Estratexia Galega de Intelixencia Artificial aprobada en xuño de 2021 e a creación do nodo galicIA, que impulsou a candidatura galega para acoller a sede da Axencia Española de Supervisión de Intelixencia Artificial. Ademais, o director da Axencia autonómica lembrou que Galicia é a primeira comunidade española que está a analizar o impacto ético da aplicación de tecnoloxías no seu territorio para poder adaptar a lexislación galega a esta nova realidade.