Entra en vigor a nova Lei de Estatística de Galicia que reforzará a capacidade do ige para responder de xeito máis eficaz ás demandas de información

• A nova normativa permitirá xerar información de maior calidade e fiabilidade, pegada ao territorio e próxima ao cidadán, aumentando as sinerxías e racionalizando custos 

Santiago de Compostela, 8 de xaneiro 2025.-  O Diario Oficial de Galicia publica hoxe a nova Lei de Estatística de Galicia que entrará en vigor dentro de 20 días. A normativa reforzará a capacidade do Instituto Galego de Estatística (IGE) para responder de xeito máis eficaz ás demandas de información. 

Ademais de afondar na capacidade deste organismo para acceder á información administrativa e integrala en bases de datos, a nova lei permitirá xerar información de maior calidade e fiabilidade, pegada ao territorio e próxima ao cidadán, aumentando as sinerxías, racionalizando custos e respondendo de xeito máis eficaz ás demandas de información da sociedade. Afondará deste xeito na transparencia, na calidade e na accesibilidade dos datos.

A nova lexislación actualiza a lei 9/1988 de Estatística de Galicia vixente desde fai 35 anos, que deu soporte aos seis plans desenvolvidos polo sistema estatístico galego, o último aínda en desenvolvemento (2022-2026). 

Nas últimas décadas apareceron novas fontes de información, así como os potentes métodos de tratamento de datos, baseados no big data e na IA que permiten reforzar a colaboración e os fluxos de datos estatísticos entre os distintos niveis da administración, así como incrementar a difusión e o acceso aos recursos estatísticos que se xeran. 

A nova lexislación profunda na normalización das perspectivas de xénero e idade, para achegar información máis precisa e axeitada ás cuestións demográficas. Isto permitirá, ademais, realizar desagregacións territoriais que non eran posibles ata o momento.

Tamén regula de xeito máis precisa o segredo estatístico tanto para os cidadáns como para as empresas, establecendo mecanismos que permitan compatibilizar o tratamento dos datos con fins estatísticos, sobre todo para contar con información inmediata en situacións de emerxencia social, coa protección de datos persoais e a cesión de datos protexidos.

A nova normativa reforza tamén a conexión do sistema estatístico coa planificación pública, para deseñar e avaliar as políticas deste sector e programar novas iniciativas. Facilitará así mesmo a investigación científica, ao favorecer o acceso dos investigadores a datos estatísticos protexidos, baixo protocolos que preserven a súa confidencialidade. 

A modificación normativa contempla aos usuarios e informantes como peza clave da estatística galega, así como a  difusión de balde na páxina web de estatísticas reutilizables e cun calendario e información adicional que facilite a súa interpretación, poñendo así a disposición da sociedade datos que permitan tomar decisións informadas a particulares e empresas, ademais da Administración.

O texto non esquece incidir na independencia profesional do persoal estatístico, poñendo o énfase na imparcialidade, obxectividade e transparencia, así como na confidencialidade dos datos achegados polos cidadáns e as empresas.