Miguel Corgos avoga por un modelo de xestión compartida dos fondos europeos

• O Comité de Seguimento do programa FEDER de Galicia 2021 2027 reuniuse en Santiago de Compostela
• No encontro valoráronse as accións que a Xunta impulsará relacionadas co ámbito da vivenda e co sector da automoción

Santiago de Compostela, 19 de febreiro de 2025.- O conselleiro de Facenda e Administración Pública, Miguel Corgos, deulles hoxe a benvida en Santiago de Compostela aos membros do Comité de Seguimento do Programa Galicia FEDER 2021-2027, e avogou por un modelo de xestión compartida dos fondos europeos.

Na súa intervención, Miguel Corgos pediu o “reforzo do papel dos entes territoriais, cun modelo de xestión compartida e unha gobernanza multinivel” para lograr unha política de cohesión máis forte e modernizada. 

O conselleiro abordou tamén dous temas prioritarios para Galicia, como son a necesidade periódica de información sobre o grao de avance do programa plurirrexional na Comunidade galega e o futuro da política de cohesión no novo marco financeiro plurianual. Así, demandou “autonomía no deseño e xestión das medidas para abordar os obxectivos das políticas europeas nos nosos territorios”, de xeito que se mellore a “converxencia económica, social e territorial, abordando as nosas diferentes necesidades”, ao tempo que se respectan os principios de asociación e subsidiariedade da UE.

A reunión estivo presidida polo director xeral de Cohesión e Fondos Europeos da Consellería de Facenda e Administración Pública, Ángel Tarrío, e por representantes da Autoridade de Xestión do Programa. Ademais, estiveron presentes membros do Ministerio de Hacienda e da Comisión Europea e das organizacións económicas e sociais con máis representatividade en Galicia. 

O programa do Comité incluíu unha visita ao Centro de atención especializada de protonterapia, “un proxecto do período de financiamento 2021-2027 a través do cal a Unión Europea apoia a construción, equipamento e modernización das instalacións”, apuntou Ángel Tarrío. A terapia de protóns é un tipo de radioterapia avanzada no tratamento de tumores e esta actuación “permitirá o tratamento dos pacientes sen necesidade de desprazarse a outros centros situados fóra de Galicia ou de España”, explicou o director xeral de Cohesión e Fondos Europeos.

Pola súa banda, a subdirectora xeral adxunta de Xestión do FEDER do Ministerio de Facenda, Ana Isabel Vega, destacou a boa marcha do programa en Galicia e reiterou o apoio do Goberno central para contribuír á súa execución. Sinalou, ademais, a importancia dos investimentos europeos no desenvolvemento de infraestruturas clave para o benestar dos cidadáns. “A visita ao novo Centro de protonterapia permítenos comprobar de primeira man como os fondos europeos están mellorando a atención sanitaria, facilitando tratamentos innovadores e reforzando o compromiso cunha sanidade pública de vangarda”, sinalou.

A Comisión Europea, pola súa parte, destacou que neste ciclo de programación do período 21-27, Galicia aposta fortemente pola dixitalización, a eficiencia enerxética, a investigación e innovación e o apoio a empresas, ademais de inversións en mobilidade sostible, adaptación ao cambio climático, sanidade e educación, entre outras iniciativas. No pasado período de financiamento, o programa destinou case o 28 % dos recursos á mitigación das consecuencias da crise da COVID-19 e a preparar o terreo para a recuperación da sociedade trala pandemia. 

Liñas de actuación para vivenda e automoción
No seo do Comité déronse a coñecer os proxectos que a Xunta de Galicia impulsará nos próximos anos en materia de vivenda, cos que se financiará a rehabilitación de edificios destinados a alugueiro social. Ademais, co FEDER apoiarase ao sector da automoción a través do desenvolvemento de proxectos de innovación industrial e levando a cabo medidas de eficiencia enerxética e de emprego de enerxías renovables.

O Comité coñeceu ademais as distintas iniciativas de comunicación e divulgación do destino dos fondos europeos que recibe Galicia. Salientouse, entre outras, a iniciativa de percorrer diferentes localidades galegas cunha exposición itinerante onde se amosarán os proxectos concretos nos que se materializan os fondos europeos recibidos.

A Administración galega xestiona preto de 950M€ de fondos FEDER, o que representa case o 45% dos 2.132 M€ destes recursos destinados á Comunidade Autónoma, mentres que o 55% restante é xestionado pola Administración xeral do Estado. O Programa Galicia FEDER 2021-2027 ten como obxectivo impulsar ata o ano 2029 a transición ecolóxica e dixital de cara a unha Galicia máis competitiva, intelixente, sostible e inclusiva.